پورٹ گرینڈ فوڈاسٹریٹ دوماہ میں عوام کیلئے کھول دی جائیگی- بابر غوری

وفاقی وزیر برائے پورٹس اینڈ شپنگ بابر خان غوری نے کہا ہے کہ نیٹی جیٹی برج سے متصل جنوبی ایشیا کی سب سے بڑی فوڈ اسٹریٹ ” پورٹ گرینڈ“ 2 ماہ کے اندر عوام کیلئے کھول دی جائے گی۔ اتوار کو کراچی میں گورنر سندھ ڈاکٹر عشرت العباد خان اور صوبائی وزیر بلدیات آغا سراج درانی کو مذکورہ فوڈ اسٹریٹ کا دورہ کرانے کے بعد ذرائع ابلاغ سے گفتگو میں بابرغوری نے بتایا کہ ایک ارب روپے کی پرائیویٹ سرمایہ کاری سے یہ منصوبہ کراچی پورٹ ٹرسٹ ( کے پی ٹی ) کی 13ایکڑ زمین پر تعمیر کیا جارہا ہے۔ اس موقع پر گورنر سندھ ڈاکٹر عشرت العباد نے کہا کہ یہ منصوبہ کراچی کے عوام کیلئے بہت بڑا تحفہ ہوگا اور فوڈ اسٹریٹ پاکستان میں بین الاقوامی معیار کی پہلی تفریح گاہ ثابت ہوگی۔ انہوں نے کام کے معیار اور رفتار پر اطمینان کا اظہار کیا۔ گورنر نے منصوبے کے ڈیزائن کی تعریف کرتے ہوئے کہا کہ اس کی مکمل تزئین و آرائش کے بعد پورٹ گرینڈ نہایت دیدہ زیب نظارہ پیش کرے گا۔ اس موقع پر گورنر نے منصوبے کی تعمیر کرنے والی فرم کے چیف ایگزیکٹو شاہد فیروز کی کوششوں کو بھی سراہا۔ وفاقی وزیر بابر غوری نے کہا کہ یہ جنوبی ایشیا کی سب سے بڑی فوڈ اسٹریٹ ثابت ہوگی اور اس منصوبے کا افتتاح 2 ماہ کے عرصے میں کر دیا جائے گا۔ صوبائی وزیر آغا سراج درانی نے کہا کہ اس منصوبے کی تعمیر خوش آئند بات ہے، اس سے عوام کو تفریح کے صحت مند مواقع حاصل ہوں گے۔ انہوں نے کہا کہ اس زمین کا بہت بہتر استعمال کیا گیا ہے جو اس سے پہلے قبضہ گروپوں اور منشیات فروشوں کے قبضے میں تھی۔